വ്യാജ സിദ്ധന്മാർക്കെതിരെ നടപടിയെടുക്കുക

തൊട്ടടുത്ത രണ്ടാഴ്ച്ചകളിലായി രണ്ടു ധ്യാനങ്ങൾക്കാണ്  ചിക്കാഗോ സീറോ മലബാർ കത്തീഡ്രൽ വേദിയായത് . ആദ്യത്തേത് ബിഷപ്പ് ജോർജ് ഞരളക്കാട്ടിന്റെ ഏകദിന ധ്യാനം. വിഷയം "വിശ്വാസം". അത്ഭുതങ്ങൾ ഒന്നും തന്നെ നടക്കാതിരുന്ന ഈ ധ്യാനം  സാമാന്യ മനുഷ്യർക്ക്‌ ഒരുവിധം ദഹിക്കുന്നതായിരുന്നു



തൊട്ടടുത്ത ആഴ്ച നടന്നത്  വെറും ധ്യാനമല്ല . കണ്‍വെൻഷൻ ! അതും പോട്ട  ടീമിന്റെ . A ടീം തന്നെയാണ് പോട്ടയിൽ നിന്നും വന്നത് . നായ്ക്കം പറമ്പിലും, പനക്കലും, പ്രാസംഗികരും പാട്ടുകാരും, പ്രാർഥിക്കാൻ സി തെരേസയും .

ഭാര്യ തലക്കു സ്വൈര്യം തരാഞ്ഞതുകൊണ്ട് അവസാന ദിവസം ഒന്ന് മുഖം കാണിക്കാമെന്നു വിചാരിച്ചു. പോയി .

ഒരു പറ്റം വ്യാജസിദ്ധന്മാർ ജനങ്ങളെ പട്ടാപ്പകൽ വിഡ്ഢികൾ ആക്കുകയും പോക്കറ്റടിക്കുകയും ചെയ്യുന്ന  കാഴ്ചയാണ് ഈയുള്ളവന് അവിടെ കാണാൻ കഴിഞ്ഞത് . മൂന്നു ദിവസത്തെ സ്തോത്രക്കാഴ്ച്ച കൊണ്ട് ചിലവിനു തികയില്ല. അതുകൊണ്ട് ഉദാരമായി സ്തോത്രക്കാഴ്ച്ച ഇടുക : പള്ളയിൽ കാലെടുത്തു കുത്തിയ പാടെ ഇതാണ് കേട്ടത് . പ്രെയിസ് ദി ലോർഡും ഹല്ലെലുയ്യായും കൊണ്ട് വട്ടു പിടിച്ച പോലെ കയ്യും പൊക്കി അലറുന്ന സദസ്സിനെ കണ്ടപ്പോൾ എല്ലാ ഞായറാഴ്ചയും നമ്മുടെ പള്ളിയിൽ വരുന്ന സ്ത്രീ പുരുഷന്മാർ  തന്നെയാണോ ഇതെന്ന് സംശയിച്ചു പോയി .

പ്രെയിസ് ദി ലോർഡും ഹല്ലെലുയ്യായും മൂർദ്ധന്യാവസ്ഥയിൽ എത്തിയതോടെ നമ്മുടെ സിദ്ധന്മാർ അന്ന് നടന്ന അത്ഭുതങ്ങളിലേക്ക് കടന്നു . ഇക്കാര്യത്തിൽ ഇവര കർത്താവിനെ കടത്തി വെട്ടി . നടന്ന അത്ഭുതങ്ങളുടെ ഒരു നീണ്ട ലിസ്റ്റ് തന്നെയുണ്ടായിരുന്നു . ഉദാഹരണത്തിന് . മുപ്പത്താറുപേരുടെ മുട്ടുവേദന മാറി.  നാല്പ്പത്തിമൂന്നു പേരുടെ പുറം വേദനയും . എന്നാൽ ചെവിയിലെ മൂളക്കം നിന്നത് ഇരുപത്തിയേഴുപേരുടെ മാത്രമാണ് . എത്ര പേരുടെയാണ് പിടലി വേദന മാറിയതെന്ന് മാറിയവര്ക്ക് പോലും പിടിയില്ല .

വിദ്യാസമ്പന്നരും പ്രബുദ്ധരും എന്നവകാശപ്പെടുന്ന അമേരിക്കൻ വിശ്വാസികൾ പോലും ബൈബിളും പൊക്കിപ്പിടിച്ചു കൊണ്ട് ചെപ്പിടി വിദ്യകാട്ടുന്ന ഇക്കൂട്ടരുടെ വലയത്തിൽ അകപ്പെട്ടുപോകുന്നു എന്ന് വിശ്വസിക്കാൻ കഴിയുന്നില്ല . പല ധ്യാന ടീമുകളും ഈ സമയം അമേരിക്കയിലും യൂറോപ്പിലും ചുറ്റിക്കറങ്ങി ജനങ്ങളെ കബളിപ്പിച്ചു കൊണ്ട് നടക്കുന്നുണ്ട് . ഈ തട്ടിപ്പ് പ്രസ്ഥാനങ്ങൾക്ക്‌ കടിഞ്ഞാണിടുവാൻ സഭാനേതൃത്വം തയ്യാറാകുന്നില്ല എങ്കിൽ സർക്കാർ തന്നെ ഇടപെടെണ്ടാതാണ് .

കേരളത്തിൽ ജനങ്ങളെ പറ്റിച്ചു വയറ്റിൽപ്പിഴപ്പ് നടത്തിയിരുന്ന പല ഹൈന്ദവ  വ്യാജ സിദ്ധന്മാരെയും പോലീസ് പിടിച്ചിട്ടുണ്ട് . എന്നാൽ ആയിരക്കണക്കിന് ജനങ്ങളെ ഒറ്റയടിക്ക് കബളിപ്പിക്കുന്ന ക്രൈസ്തവ വ്യാജസിദ്ധന്മാർക്കെതിരെ നടപടികൾ എടുക്കാൻ സർക്കാർ തയ്യാറാകുന്നില്ല . ഈയടുത്ത കാലത്ത് ചെങ്ങന്നൂരോ മറ്റോ  ചിക്കൻ ഫ്രൈയും ബീഫ് ഫ്രൈയും വാങ്ങിക്കൊടുത്തു മന്ദബുദ്ധിയായ ഒരു യുവാവിന്റെ കോടിക്കണക്കിനു രൂപയുടെ സ്വത്തു ചിലർ തട്ടിയെടുത്തതായി പത്രത്തിൽ വായിച്ചിരുന്നു . രാഷ്ട്രീയ സ്വാധീനം പോലുമുണ്ടായിരുന്ന പ്രസ്തുത തട്ടിപ്പുകാരെ  പോലീസ് തല്ക്ഷണം അറസ്റ്റ് ചെയ്തു . എന്നാൽ ഒരു ചിക്കൻ ഫ്രൈയൊ ബീഫ് ഫ്രൈയൊ പോലും വാങ്ങി കൊടുക്കാതെ മോനിക്കാ-തോമസ്‌ ദമ്പതിമാരുടെ കോടിക്കണക്കിനു രൂപയുടെ സ്വത്ത്‌ തട്ടിയെടുത്ത തസ്ക്കര വീരന്മാർ ആവേ മരിയ ധ്യാനകേന്ദ്രത്തിൽ അവരുടെ തൊഴിൽ നിർബാധം തുടരുന്നു .